ཉི་འོད་རིག་ནུས་ཚོད་ལྟ་བྱས་པ།

ཉི་འོད་རིག་ནུས་ཚོད་ལྟ་བྱས་པ།

(རིག་ནུས་འདི་མི་འགྱངས་བར་ཁྲོམ་རར་འདོན་ངེས།)

ཉེར་སྤྱོད་པ།: ཁམས་བཟང་། ཆབ་སྲིད་ཛོར་པོ་ཟེར་ན་ཅི་ཞིག་རེད་དམ།

ཉི་འོད་རིག་ནུས།: ཁམས་བཟང་། ཆབ་སྲིད་ཛོར་པོ་ཟེར་ན་ཆབ་སྲིད་པས་རང་གི་ཁེ་ཕན་འགྲུབ་ཆེད་དུ་མི་དམངས་ལ་མགོ་སྐོར་གཏོང་བ་སོགས་བཟང་སྤྱོད་དང་འགལ་བའི་བྱ་བ་བྱེད་པ་དེ་ལ་གོ དེ་ལ་དབྱེ་སྣ་མང་པོ་ཡོད། སྡུག་ཤོས་ནི་ཆབ་སྲིད་པས་སྤྱི་ཚོགས་ཀྱི་འཁྲུག་གཞིའམ་རྨ་ཁ་ལ་བསམ་བཞིན་དུ་མཛུབ་བཙུགས་བྱས་ནས་འཁྲུག་གཞི་ཇེ་ཆེ་དང་རྨ་ཁ་ཇེ་ཟབ་བཏང་སྟེ་སྤྱི་ཚོགས་དུམ་བུར་བཏང་ནས་རང་གི་རྐུབ་བཀྱག་སྲུང་ཐབས་བྱེད་པའི་ཐ་ཤལ་གྱི་བྱ་སྤྱོད་དེ་ཡིན།

ཉེར་སྤྱོད་པ།: ཆབ་སྲིད་ཛོར་པོའི་དངོས་ཡོད་ཀྱི་དཔེ་མཚོན་འགའ་གསུང་དང་།

ཉི་འོད་རིག་ནུས།: ལགས་སོ། སྤྱི་ཚོགས་མི་འདྲ་བ་སོ་སོར་འཁྲུག་གཞི་དང་འགལ་རྐྱེན་མི་འདྲ་བ་སྣ་ཚོགས་ཡོད་ཙང་ཆབ་སྲིད་ཛོར་པོ་རྩེད་མཁན་ཚོ་ལའང་དེ་མཚུངས་ཀྱིས་རྩེད་ཆས་མི་འདྲ་བ་མང་པོ་ཡོད། རྒྱ་གར་གྱི་སྤྱི་ཚོགས་ལྟ་བུར་མཚོན་ན་ཁ་ཆེ་དང་ཧིན་དྷུའི་ཆོས་ལུགས་དབར་ལོ་རྒྱུས་ཀྱི་རྨ་ཁ་ཆེན་པོ་ཡོད་ཙང་ཆབ་སྲིད་ཛོར་པོ་འཁྲབ་མཁན་ཚོས་ག་དུས་ཡིན་ནའང་ཆོས་ལུགས་ཀྱི་མི་ངཐོག་ནས་རྨ་ཁ་དེར་མཛུབ་བཙུགས་བྱས་ནས་རང་གི་ཁེ་ཕན་འགྲུབ་ཐབས་བྱེད་ཀྱིན་ཡོད། ཨ་རིི་ལྟ་བུར་མཚོན་ན་མི་རིགས་དཀར་ནག་གཉིས་ཀྱི་རྨ་ཁ་དང་ཡུལ་མི་དང་ཕྱི་མི་གནས་སྤོས་བའི་དབར་འགལ་བ་ཆེན་པོ་ཡོད་ཙང་ཆབ་སྲིད་ཛོར་པོ་འཁྲབ་མཁན་ཚོས་དེ་རྩེད་ཆས་བྱས་ནས་རང་ལ་འོས་ཤོག་ཐོབ་ཐབས་བྱེད་ཀྱིན་ཡོད།

ཉེར་སྤྱོད་པ།: བཙན་བྱོལ་བོད་མིའི་སྤྱི་ཚོགས་ལ་དེ་འདྲའི་གནས་ཚུལ་ཡོད་དམ།

ཉི་འོད་རིས་ནུས།: བཙན་བྱོལ་བོད་མིའི་སྤྱི་ཚོགས་ནི་གཞན་བརྟེན་གྱི་སྤྱི་ཚོགས་ཧ་ཅང་ཆུང་ཆུང་ཞིག་ཡིན། དེ་ནི་རང་བཙན་མེད་པའི་སྐྱབས་བཅོལ་བའི་སྤྱི་ཚོགས་ཤིག་ཡིན་པས་ཆབ་སྲིད་ཛོར་པོ་འཁྲབ་མཁན་ཡོད་མི་འོས་པ་ཡིན་མོད། འོན་ཀྱང་ཡིད་སྐྱོ་བ་ཞིག་ལ་སྤྱི་ཚོགས་དེ་ལའང་ཆབ་སྲིད་ཛོར་པོ་འཁྲབ་མཁན་དང་འཁྲབ་སའང་གང་འཚམ་ཡོད། སྤྱི་ཚོགས་དེའི་རྨ་ཁའམ་འཁྲུག་གཞི་ཆེ་ཤོས་ཤིག་ནི་ཆོལ་ཁའི་འཐེན་འཁྱེར་རེད། ཆབ་སྲིད་ཛོར་པོ་འཁྲབ་མཁན་ཚོས་ཆོལ་ཁའི་རྨ་ཁར་མཛུབ་བཙུགས་བྱས་ནས་རང་ལ་འོས་ཤོག་ཐོབ་ཐབས་བྱེད་བཞིན་ཡོད། མཐོ་རིམ་འགོ་ཁྲིད་ཀྱི་གཏམ་བཤད་ནང་ཆོལ་ཁ་བྱེ་བྲག་ཏུ་བཀར་ནས་སྐྱོན་བརྗོད་དང་ཟུར་ཟ་བྱེད་པ་མི་ཉུང་བ་ཞིག་མཐོང་རྒྱུ་ཡོད།

ཉེར་སྤྱོད་པ།: ཆབ་སྲིད་ཛོར་པོའི་མཇུག་འབྲས་གང་ཡིན་ནམ།

ཉི་འོད་རིག་ནུས།: དུས་ནམ་དུའང་ཆབ་སྲིད་ཛོར་པོ་ལ་མཇུག་འབྲས་བཟང་པོ་ཞིག་ཐོབ་མི་སྲིད་པ་ཡིན། དེ་ལས་ལྡོག་སྟེ་དེས་སྤྱི་ཚོགས་ཧྲིལ་པོ་དུམ་བུར་བཏང་ནས་མཉམ་རུབ་ཀྱི་ནུས་པ་རྩ་མེད་གཏོང་བ་མ་ཟད་དམངས་གཙོའི་སྤྱི་ཚོགས་ཁྲོད་མི་དམངས་ཀྱི་ནུས་པ་ཇེ་ཞན་དུ་གཏོང་གི་ཡོད། ལྷག་པར་དུ་སྤྱི་ཚོགས་ཧྲིལ་པོའི་ནུས་ཤུགས་མཉམ་སྤུངས་དགོས་སའི་རང་དབང་འཐབ་རྩོད་དང་སྤྱི་ཚོགས་འཕེལ་རྒྱས་ཀྱི་ལས་རིགས་ལ་དེས་གནོད་སྐྱོན་ཚབས་ཆེན་གཏོང་བཞིན་ཡོད།

ཉེར་སྤྱོད་པ།: དེ་ལ་མཇུག་འབྲས་ངན་པ་མ་གཏོགས་མེད་ན་ཆབ་སྲིད་ཀྱི་འགོ་ཁྲིད་ཚོས་ཆབ་སྲིད་ཛོར་པོ་དེ་འདྲ་ག་རེ་བྱས་ན་འཁྲབ་ཀྱིན་ཡོད་དམ།

ཉི་འོད་རིག་ནུས།: དྲི་བ་འདི་ཧ་ཅང་གནད་འགག་རེད། ཆབ་སྲིད་ཛོར་པོ་འཁྲབ་མཁན་ཚོས་རང་གི་བྱ་ངན་དེའི་མཇུག་འབྲས་ངན་པ་གསལ་པོ་ཤེས་ཀྱིན་ཡོད་ཀྱང་ཁོང་ཚོས་བསམ་བཞིན་དུ་སྡིག་པ་མིག་བཙུམ་བྱས་ན་སྤྱི་ཚོགས་དུམ་བུར་བཏང་སྟེ་རང་གི་སྲིད་དབང་སྲ་བརྟན་གཏོང་ཐབས་བྱེད་ཀྱིན་ཡོད། དེ་ནི་རང་གི་སྲིད་ཀྱི་རྐུབ་བཀྱག་དང་སྤྱི་ཚོགས་ཧྲིལ་པོའི་འཆམ་མཐུན་མཉམ་གནས་གཉིས་བརྗེ་པོ་བརྒྱབས་པའམ་རང་གི་རྐུབ་བཀྱག་དང་སྤྱི་པའི་ཁ་ཕེན་གཉིས་བརྗེ་པོ་བྱས་པའི་ནག་ཚོང་ཞིག་རེད། ཆབ་སྲིད་ཛོར་པོ་ཇི་ཙམ་མང་ན་སྤྱི་ཚོགས་དེ་འཕེལ་རྒྱས་དང་དཔལ་ཡོན། ཞི་བདེ་དང་འཆམ་མཐུན་སོགས་དང་ཁ་ཐག་དེ་ཙམ་རིང་བ་ཆོས་ཉིད་རེད།

ཉེར་སྤྱོད་པ།: བྱས་ན་ཆབ་སྲིད་ཛོར་པོ་འཁྲབ་མཁན་ཚོའི་གནས་ཚད་གང་འདྲ་ཡིན་ནམ།

ཉི་འོད་རིག་ནུས།: འདི་ཡང་དྲི་བ་གནད་འགག་ཅན་ཞིག་རེད། ཆབ་སྲིད་ཛོར་པོ་འཁྲབ་རྒྱུ་ནི་ཆབ་སྲིད་པ་ཐ་ཤལ་ཚོའི་ལས་ཀ་ཉག་ཅིག་རེད། ཁོང་ཚོར་རང་གི་འཇོན་ནུས་དང་བློ་ཕུགས་ལ་བརྟེན་ནས་སྲིད་དབང་སྐྱོང་ཐུབ་པ་དང་། མི་དམངས་ཀྱི་བློ་འགུག་ཐུབ་པ། སྤྱི་ཚོགས་ཧྲིལ་པོར་འཆམ་མཐུན་ངང་འཕེལ་རྒྱས་གཏོང་ཐུབ་པའི་འཇོན་ནུས་དང་བློ་ཁོག་མེད་པར་བརྟེན་རང་གི་རྐུབ་བཀྱག་ཆེད་མ་རབས་ཐ་ཤལ་གྱི་ཆབ་སྲིད་ཛོར་པོའི་བྱ་བ་དེ་རིགས་སྒྲུབ་ཀྱིན་ཡོད།

ཉེར་སྤྱོད་པ།: དེས་ན་ཆབ་སྲིད་ཛོར་པོ་མེད་པར་གཏོང་ཐབས་ཡོད་དམ།

ཉི་འོད་རིག་ནུས།: ཆབ་སྲིད་ཛོར་པོ་མེད་པར་གཏོང་ཐབས་གཙོ་བོ་ནི་མི་དམངས་ཁྲོད་གོ་རྟོགས་ལེགས་པོ་ཡོད་དགོས་པ་དེ་ཡིན། མི་དམངས་ཀྱིས་ཆབ་སྲིད་ཛོར་པོས་སྤྱི་ཚོགས་ལ་ཕན་ཏིལ་འབྲུ་ཙམ་ཡང་མེད་པར་དེ་ལས་ལྡོག་སྟེ་གནོད་ཚབས་ཆེན་སྐྱེལ་བཞིན་པའི་དོན་དངོས་ཤེས་པའི་ཐོག་ཆབ་སྲིད་ཛོར་པོ་འཁྲབ་མཁན་ལ་གཞོགས་འདེགས་རྩ་ནས་བྱེད་མི་རུང་། དེ་མིན་ཆབ་སྲིད་འཛོར་པོ་འཁྲབ་མཁན་གྱི་ཁ་ལ་ཉན་ནས་ནང་འཁྲུག་བརྒྱབས་པ་ཡིན་ན་ཆབ་སྲིད་ཛོར་པོ་འཁྲབ་མཁན་གྱི་དམིགས་ཡུལ་འགྲུབ་པ་ཡིན་པས་ཁོང་ཚོས་མ་འོངས་པར་ཡང་ནས་ཡང་དུ་བྱེད་ཐབས་དེ་བཀོལ་སྤྱོད་བྱ་ངེས་རེད།

ཉེར་སྤྱོད་པ།: ལན་འདེབས་གནང་བར་ཐུགས་རྗེ་ཆེ། བློ་སྐྱེད་གང་འཚམ་བྱུང་།

ཉི་འོད་རིག་ནུས།: ཁྱེད་ལ་ཞབས་ཞུ་བསྒྲུབ་རྒྱུ་བྱུང་བར་དགའ་ཡོད། དྲི་བ་ཡོད་ན་རྗེས་མར་མུ་མཐུད་འདྲི་རོགས། གང་ཐུབ་ཀྱིས་ལན་འདེབས།