བོད་ནང་རྒྱ་ནག་གི་བཙན་དབང་མཉམ་བསྲེས་སྲིད་བྱུས་ལ་སྐྱོན་བརྗོད།

VOK Tibetan | ཕྱི་ལོ་༢༠༢༦ ཟླ་༡༠ ཚེས་༩།

༄༅། །ཡུ་རོབ་གྲོས་ཚོགས་ཀྱིས་ཡུ་རོབ་མཐུན་ཚོགས་དང་རྒྱ་ནག་བར་གྱི་ཆབ་སྲིད་འབྲེལ་བའི་སྐོར་གྱི་གྲོས་འདེབས་ཤིག་གཏན་འབེབས་གནང་སྟེ། བོད་ནང་རྒྱ་ནག་གཞུང་གིས་ལག་བསྟར་བྱེད་བཞིན་པའི་རྒྱ་སྒྱུར་དང་བཙན་དབང་གི་མཉམ་བསྲེས་སྲིད་བྱུས་ལ་སྐྱོན་བརྗོད་ནན་པོ་གནང་ཡོད།

ཕྱི་ཟླ་༡༠ ཚེས་༧ ཉིན་གནང་བའི་འོས་བསྡུའི་ནང་། གྲོས་འདེབས་དེར་རྒྱབ་སྐྱོར་འོས་༤༥༤ དང་། ངོ་རྒོལ་འོས་༨༦། འོས་མ་བླུགས་པ་༡༡༠ བཅས་བྱུང་ཡོད། སྙན་ཐོ་དེ་ནི་ཡུ་རོབ་གྲོས་ཚོགས་ཀྱི་ཕྱི་འབྲེལ་ལས་དོན་ཚོགས་ཆུང་གི་ཚབ་ཞུས་ཏེ། སྙན་སྒྲོན་པ་ཧིལ་ཌེ་ཝོཊ་མནས་ (Hilde Vautmans) ལགས་ཀྱིས་བཏོན་པ་ཞིག་ཡིན།

བོད་ཀྱི་སྐད་ཡིག་དང་རིག་གཞུང་ཉམས་ཉེན་ལ་ཐུགས་འཚབ།

www.bod.asia ཡི་གནས་ཚུལ་ལྟར་ན། སྙན་ཐོའི་ནང་བོད་ཀྱི་སྐད་ཡིག་དང་། རིག་གཞུང་། ཆོས་ལུགས་ཀྱི་ངོ་བོ་བཅས་ལ་ཉམས་ཉེན་འཕེལ་བཞིན་པར་ཐུགས་འཚབ་བསྟན་ཡོད། དེ་བཞིན་རིག་གཞུང་གི་ཤུལ་བཞག་གཏོར་བཤིག་དང་། རྒྱ་ཆེའི་ལྟ་སྲུང་། བཙན་སྐུལ་ངལ་རྩོལ་བཅས་ཀྱི་གནད་དོན་ལའང་སྐྱོན་བརྗོད་གནང་ཡོད།

ལྷག་པར་དུ་བོད་པའི་བྱིས་པ་ས་ཡ་གཅིག་ཙམ་ལ་ཤུགས་རྐྱེན་ཐེབས་པའི་གཞུང་འཛུགས་ཉལ་སྡོད་སློབ་གྲྭའི་ལམ་ལུགས་ལ་དོ་སྣང་གནང་ཡོད། གནས་ཚུལ་དེའི་ནང་། བྱིས་པ་རྣམས་ནང་མི་དང་ཁ་བྲལ་དུ་བཅུག་ནས་ཧན་མི་རིགས་ཀྱི་རིག་གཞུང་ནང་མཉམ་བསྲེས་བྱེད་པས། ཁོང་ཚོའི་སེམས་ཁམས་དང་ཕ་སྐད། སྲོལ་རྒྱུན་བཅས་ལ་གནོད་སྐྱོན་བཟོ་བཞིན་པར་བརྟེན། ལམ་ལུགས་དེ་མཚམས་འཇོག་དགོས་པའི་འབོད་སྐུལ་བྱས་ཡོད་ཅེས་འཁོད་ཡོད།

༸གོང་ས་མཆོག་གི་ཡང་སྲིད་གནད་དོན་ལ་ཐེ་བྱུས་མི་བྱེད་རྒྱུ།

གནས་ཚུལ་དེ་ལྟར་ན། ཡུ་རོབ་གྲོས་ཚོགས་ཀྱིས་རྒྱ་ནག་གཞུང་གིས་བོད་བརྒྱུད་ནང་བསྟན་གྱི་ཆོས་ལུགས་ལས་དོན་ནང་ཐེ་བྱུས་བྱེད་པར་དགག་པ་གནང་ཡོད། ལྷག་པར་༸གོང་ས་༸སྐྱབས་མགོན་ཆེན་པོ་མཆོག་གི་ཡང་སྲིད་ངོས་འཛིན་ལ་ཆབ་སྲིད་ཀྱི་ཐེ་བྱུས་བྱེད་པར་ངོ་རྒོལ་བྱས་ཏེ། ཆོས་ལུགས་ཀྱི་རང་དབང་དང་རང་སྐྱོང་སྲུང་སྐྱོབ་བྱ་དགོས་པ་ནན་བརྗོད་གནང་ཡོད།

དེ་དང་མཉམ་དུ། པཎ་ཆེན་རིན་པོ་ཆེ་དགེ་འདུན་ཆོས་ཀྱི་ཉི་མ་མཆོག་གང་དུ་ཡོད་མེད་ཀྱི་གནས་ཚུལ་མྱུར་དུ་གསལ་སྟོན་བྱ་དགོས་པའི་འབོད་སྐུལ་ཡང་ཞུས་ཡོད།

གོད་ཆག་སྐོར་གྱི་གནས་ཚུལ་གསལ་སྟོན་དགོས་པའི་འབོད་སྐུལ།

www.bod.asia ཡི་གནས་ཚུལ་ནང་། ཕྱི་ཟླ་༨ ཚེས་༢༦ ཉིན་བོད་དང་བལ་ཡུལ་ས་མཚམས་སུ་བྱུང་བའི་ཆུ་རུད་ཀྱི་གོད་ཆག་རྗེས། རྒྱ་ནག་གཞུང་གིས་འཆི་སྐྱོན་གྲངས་འབོར་སྦས་གསང་དང་། སྤྱི་ཚོགས་དྲ་ལམ་གྱི་གནས་ཚུལ་བསུབ་པ། གནས་ཚུལ་སྤེལ་མཁན་ལ་ཉེས་ཆད་གཅོད་པ་བཅས་བྱས་པའི་སྐོར་སྙན་ཐོར་འཁོད་ཡོད་ཅེས་བཀོད་ཡོད།

དེར་བརྟེན་རང་དབང་ལྡན་པའི་གསར་འགོད་པ་དང་མི་ཆོས་རོགས་སྐྱོབ་ཚོགས་པ་རྣམས་ལ། གོད་ཆག་བྱུང་ཡུལ་དུ་བཀག་འགོག་མེད་པར་འགྲོ་སྐྱོད་དང་། རྟོག་ཞིབ། རོགས་སྐྱོབ་བཅས་བྱེད་དུ་འཇུག་དགོས་པའི་འབོད་སྐུལ་བྱས་ཡོད།

ཡུ་རོབ་དང་རྒྱ་ནག་གི་འབྲེལ་བར་མིའི་ཐོབ་ཐང་གཙོ་བོར་འཇོག་དགོས།

སྙན་ཐོའི་སྐོར་གྱི་གནས་ཚུལ་ནང་། ཡུ་རོབ་མཐུན་ཚོགས་ཀྱིས་རྒྱ་ནག་དང་ཆབ་སྲིད་འབྲེལ་མོལ་བྱེད་སྐབས། འགྲོ་བ་མིའི་ཐོབ་ཐང་དང་གྲངས་ཉུང་མི་རིགས་ཀྱི་ཐོབ་ཐང་གི་གནད་དོན་རྒྱུན་མཐུད་གླེང་སློང་བྱ་དགོས་པ་བཀོད་ཡོད། དེ་བཞིན་ཡུ་རོབ་རྒྱལ་ཁབ་ཁག་ནང་ཁྲིམས་འགལ་གྱིས་ལས་འགུལ་སྤེལ་བའི་རྒྱ་ནག་གི་ཕྱི་སྡོད་ཉེན་རྟོག་ལས་ཁུངས་རྣམས་སྒོ་རྒྱག་དགོས་པའི་འབོད་སྐུལ་ཡང་བྱས་ཡོད།

སྦར་སིལ་བོད་དོན་ཁང་གི་སྐུ་ཚབ་རིག་འཛིན་གངས་ལགས་ཀྱིས་སྙན་ཐོ་དེར་དགའ་བསུ་ཞུས་ཏེ། ཡུ་རོབ་གྲོས་ཚོགས་ཀྱིས་བོད་མིའི་ཐོབ་ཐང་ཆེད་རྒྱུན་མཐུད་རྒྱབ་སྐྱོར་གནང་བར་ཐུགས་རྗེ་ཆེ་ཞུས་ཡོད།

གནས་ཚུལ་གྱི་གཞི་ཁུངས། www.bod.asia ཡི་ཕྱི་ལོ་༢༠༢༦ ཟླ་༡༠ ཚེས་༩ ཉིན་གྱི་གནས་ཚུལ།